20 Yanvar 1990-cı il Azərbaycan xalqının çoxəsrlik tarixində təkcə bir faciə deyil, eyni zamanda milli iradənin, azadlıq eşqinin və müstəqillik uğrunda qurban verməyə hazır olmağın ən ali nümunəsidir. Həmin qanlı gecə sovet imperiyasının hərbi-siyasi rəhbərliyi tərəfindən Bakıda və respublikanın digər bölgələrində dinc əhaliyə qarşı misli görünməmiş vəhşilik törədilmiş, qadın, uşaq, yaşlı demədən yüzlərlə günahsız insan amansızcasına qətlə yetirilmişdir.
Tankların, zirehli texnikanın və silahlı hərbi birləşmələrin xalqın üzərinə yeridilməsi, fövqəladə vəziyyət elan edilmədən şəhərə hücum edilməsi, təcili tibbi yardım maşınlarının belə atəşə tutulması bu faciənin planlı və məqsədli şəkildə həyata keçirildiyini bir daha sübut edir. Bu hadisə beynəlxalq hüququn, insan haqlarının və humanizm prinsiplərinin kobud şəkildə pozulması idi.
20 Yanvar faciəsi eyni zamanda Azərbaycan xalqının sarsılmaz iradəsini ortaya qoydu. Qan tökülməsinə baxmayaraq, xalq azadlıq istəyindən geri çəkilmədi, qorxuya boyun əymədi. Şəhidlərimizin tökülən qanı milli azadlıq hərəkatını daha da gücləndirdi və müstəqil Azərbaycan dövlətinin təməl daşına çevrildi.
“AÇIQ GÖZ” İctimai Nəzarət Təşkilatı olaraq bəyan edirik ki, 20 Yanvar faciəsi insanlığa qarşı törədilmiş ağır cinayət kimi tarixdə qalmalı və bu cinayəti törədənlərin siyasi və hüquqi məsuliyyəti daim gündəmdə saxlanılmalıdır. Bu faciənin unudulmasına, təhrif edilməsinə və ya kiçildilməsinə yol verilməməlidir. Tarixi həqiqətlərin qorunması, gənc nəslin milli yaddaş ruhunda tərbiyə olunması cəmiyyət qarşısında duran ən mühüm vəzifələrdəndir.
Biz hesab edirik ki, 20 Yanvar yalnız matəm günü deyil, həm də milli ləyaqət, birlik və dövlətçilik dərsidir. Bu gün Azərbaycan dövləti məhz həmin şəhidlərin canı və qanı bahasına müstəqildir, güclüdür və öz sözünü beynəlxalq aləmdə qətiyyətlə deyir.
“AÇIQ GÖZ” İctimai Nəzarət Təşkilatı şəhidlərimizin əziz xatirəsini dərin hörmət və ehtiramla yad edir, onların ailələrinə və yaxınlarına başsağlığı verir. Biz Azərbaycan cəmiyyətini 20 Yanvar şəhidlərinin xatirəsini daim uca tutmağa, onların ideallarına sadiq qalmağa, dövlətçiliyimizi və milli birliyimizi qorumağa çağırırıq.
Şəhidlərimizin ruhu qarşısında baş əyir, bir daha bəyan edirik:
Azərbaycan xalqı öz azadlıq yolundan heç vaxt dönməyəcək!
Şəhidlər ölməz, Vətən bölünməz!
20 Yanvar – Milli Qürur və Şərəf Günümüzdür!
Hörmətlə,
“AÇIQ GÖZ” İctimai Nəzarət Təşkilatı
About the Author
